Twee dot sick tohaupe
Een eenzigortiget Kulturgout bi us up’n Lanne is use plattdütske Sprauke. Auck wenn se vandage etwas ut de Mode kuomen is, is se doch wat ganz Besünneres. Up Platt giff et Wörder, de kann’m man knapp no Hauge üwersetten. Un wenn Du mol eenen up Platt sau richtich de Wacht ansecht häss, dann is he di achterhiär no nich mol boise, auck wenn he sick doch derbe vofärht heff.
Düsse Sprauke to erhaulen un jümmer we to kürden was de Grund, dat sick in Bistrupe in’n Hierwst 2016 in’n Heimat- un Wannervoeen een Arbeetskrees unner den Namen „Bistruper Platt“ tohaupefunen heff. Anfangs bi Stumpen Mia und dann in den nieen DRK-Duorphuse in Jäien driärpet sick siethier olle Maunat Fruslüe un Mannslüe un votellt sick, wat et to bekürden giff. An de plattdüsken Poetry-Slams in Bistrupe un Uptrette bi de LaGa in Bad Iburg un den Plattfoss in Sutthusen denket olle vandage no gerden trügge.
Auck de Heimat- un Vokehrsvoeen Schliärsen döt vierl dofo, dat Plattdüsk in use Ümmegieend nich vogierten wett. Veer Mol in’n Joahr kuomt siet Niesten in Göttes aule Wierkstie Lüe ut Schliärsen ower auck ut Bauhmte un Bad Essen tohaupe un häwwet jümmer masse plattdütsken Spoß. Een „Highlight“ eenmol in Joahr is gewiss dat Schlachteiärten. Do giff et güst dat uppe Gobeln, wat de meesten Ölleren van us blauts no ut de Kinnerdage kinnt.
Bi de vierlen plattdütsken Driärpsels of in Bistrupe, in Jäien orre in Schliärsen sin wi us doch naiger kuormen – man kinnt sick schließlick. Auck is et sau, dat wi olle nich mäh werd. De eene orre annere is van us gauhn orre kann ut gesundheetlichen Grunne nich me kuomen. Dat is de Loup van de Tiet. Un sau meen wi, dat et fo us olle am besten is, wenn wi us tohaupedoot.
Das eeste Driärpen nu was an den 16. April. Et was wunnerbor. Besünners fröide us, dat siet langen auck Liesel Fischer dobie was. Et harre masse to votelln.
Een paar Saken ännert sick:
- Use Krees löpp unner den Namen: „Platt in Bistrup un Schliärsen“
- Wi driärpet us in Göttes Wierkstie in Schliärsen orre do besünnere Driärpsels auck mol woanners.
- Wi kuomt jümmer an den drüdden Middewierken olle twee lieken Maunate tohaupe.
Ümme 18:00 Uhr gäiht et löss.
De nieen Termine fo vant Joahr seht nu sau ut:
Mi., 18. Jun. Grillen
Mi., 20. Aug. lüttket Fingerfood
Mi., 15. Okt. Iärftengemöüse
Mi., 17. Dez. Plattdütske Wiehnachten in de Kiärken
Mi., 14. Jan. Schlachteiärten
Wi fröit us, dat es met Platt in use Voeene wiedergäiht un et auck ürwer use Gemeende henwech luhrd: „Bistrupe kürt Platt“.
